పదో తరగతి విద్యార్థులతో ప్రైవేట్ పాఠశాలల ఆటల
తాండూర్, నవంబర్ 3 (తెలంగాణ వార్త ప్రతినిధి):
పదో తరగతి విద్యార్థుల భవిష్యత్తును తీర్చిదిద్దాల్సిన ప్రైవేట్ పాఠశాలలు వారిని చదువుల పేరుతో తీవ్ర ఒత్తిడికి గురిచేస్తున్నాయనే విమర్శలు వెల్లువెత్తుతున్నాయి. ఉదయం ఆరు గంటలకే తరగతులు ప్రారంభించి, రాత్రి 7:30 గంటల వరకు ప్రత్యేక శిక్షణ పేరుతో విద్యార్థులను పాఠశాలల్లోనే నిర్బంధిస్తున్నారనే ఆరోపణలు తాండూర్ పట్టణంలో చర్చనీయాంశంగా మారాయి. విద్యార్థుల చదువులపై శ్రద్ధ చూపాల్సిన యాజమాన్యాలు వారి ఆరోగ్యం, మానసిక ప్రశాంతత, భద్రతను విస్మరిస్తున్నాయంటూ అఖిల భారతీయ విద్యార్థి పరిషత్ (ఏబీవీపీ) తాండూర్ శాఖ తీవ్రంగా స్పందించింది.ఈ అక్రమ విద్యా విధానానికి అడ్డుకట్ట వేయాలని కోరుతూ ఏబీవీపీ నాయకులు స్థానిక మండల విద్యాశాఖ అధికారికి వినతిపత్రం అందజేశారు. ఈ సందర్భంగా వారు మాట్లాడుతూ.. ప్రభుత్వ విద్యాశాఖ నిర్దేశించిన సమయపాలన నిబంధనలను పక్కనపెట్టి ప్రైవేట్ పాఠశాలలు ఇష్టారాజ్యంగా వ్యవహరిస్తున్నాయని మండిపడ్డారు. ఉదయం నుంచి రాత్రి వరకు తరగతి గదుల్లోనే గడపాల్సి రావడంతో పదో తరగతి విద్యార్థులు మానసికంగా, శారీరకంగా అలసిపోతున్నారని ఆవేదన వ్యక్తం చేశారు.
చదువు పేరుతో విద్యార్థుల భద్రతతో చెలగాటం!
ముఖ్యంగా గ్రామీణ ప్రాంతాల నుంచి తాండూర్‌కు వచ్చి చదువుకుంటున్న విద్యార్థుల పరిస్థితి మరింత దయనీయంగా మారిందని ఏబీవీపీ నాయకులు పేర్కొన్నారు. రాత్రి 7:30 గంటలకు పాఠశాలలు వదిలిన తర్వాత ఇళ్లకు చేరుకునే సరికి రాత్రి 9 గంటలు దాటుతోందని తెలిపారు. ఆ సమయంలో సరిపడా ఆర్టీసీ బస్సులు అందుబాటులో లేక విద్యార్థులు తీవ్ర ఇబ్బందులు ఎదుర్కొంటున్నారని, రాత్రి వేళల్లో వారి ప్రయాణ భద్రత ప్రశ్నార్థకంగా మారుతోందని ఆందోళన వ్యక్తం చేశారు.పదో తరగతి పరీక్షల్లో మంచి మార్కులు సాధించాలనే లక్ష్యంతో విద్యార్థులపై ఇంతటి భారాన్ని మోపడం ఎంతవరకు సమంజసమని ప్రశ్నించారు. విద్యార్థులపై ఒత్తిడి పెంచడం ద్వారా నాణ్యమైన విద్య అందించినట్లు కాదని, వారి ఆరోగ్యాన్ని దెబ్బతీసే విధానాలను వెంటనే నిలిపివేయాలని స్పష్టం చేశారు.విద్యాశాఖ అధికారులు తక్షణమే స్పందించి ప్రైవేట్ పాఠశాలల్లో తనిఖీలు నిర్వహించాలని, నిబంధనలకు విరుద్ధంగా తరగతులు నిర్వహిస్తున్న యాజమాన్యాలపై కఠిన చర్యలు తీసుకోవాలని డిమాండ్ చేశారు. అధికారులు నిర్లక్ష్యం వహిస్తే ఏబీవీపీ ఆధ్వర్యంలో విద్యార్థుల హక్కుల పరిరక్షణ కోసం పెద్ద ఎత్తున ప్రజాస్వామ్యబద్ధమైన ఆందోళనలు చేపడతామని హెచ్చరించారు.
