తాండూర్, అక్టోబర్ 24 ( తెలంగాణ వార్త ప్రతినిధి) : తెలంగాణ అసెంబ్లీ ఎన్నికలకు ఇంకా రెండేళ్ల సమయం ఉన్నప్పటికీ, తాండూర్ నియోజకవర్గ బీఆర్ఎస్‌లో ఎమ్మెల్యే టికెట్‌ అంశం ఇప్పటి నుంచే రాజకీయంగా ఆసక్తిని రేకెత్తిస్తోంది. వచ్చే ఎన్నికల్లో పార్టీ అభ్యర్థి ఎవరనే అంశంపై చర్చలు ఊపందుకుంటుండగా, ఆశావహుల మధ్య పోటీ పార్టీ అంతర్గత రాజకీయాలను వేడెక్కిస్తున్నట్లు కనిపిస్తోంది.
బీసీ సమీకరణాల నేపథ్యంలో శుభప్రద్ పటేల్ పేరు..!
తాండూర్ బీఆర్ఎస్ అభ్యర్థి ఎంపికలో సామాజిక సమీకరణాలు కీలకంగా మారవచ్చనే చర్చ రాజకీయ వర్గాల్లో సాగుతోంది. ఈ నేపథ్యంలో తెలంగాణ ఉద్యమకారుడిగా పనిచేసిన, గతంలో బీసీ కమిషన్ సభ్యుడిగా బాధ్యతలు నిర్వహించిన నూలి శుభప్రద్ పటేల్ పేరు తెరపైకి వస్తోంది. బీసీ సామాజికవర్గానికి ప్రాధాన్యం కల్పించే దిశగా పార్టీ ఆలోచిస్తే, ఆయన అభ్యర్థిత్వంపై చర్చ మరింత పెరిగే అవకాశం ఉందనే అభిప్రాయాలు వ్యక్తమవుతున్నాయి. అయితే, ఆయనకు టికెట్‌ ఖరారైనట్లు అధికారిక ప్రకటన ఏదీ వెలువడలేదు.
పైలెట్ రోహిత్ రెడ్డి ఫ్రేమ్ హౌస్ ఘటన తర్వాత మారిన రాజకీయ సమీకరణాలు..!
మరోవైపు, మాజీ ఎమ్మెల్యే పైలెట్ రోహిత్ రెడ్డి ఫ్రేమ్ హౌస్ ఘటన తర్వాత తాండూర్ బీఆర్ఎస్ రాజకీయాల్లో చర్చనీయాంశంగా మారింది. ఈ పరిణామం నేపథ్యంలో ఆయన రాజకీయ భవిష్యత్తు, పార్టీతో ఆయన సంబంధాలు, వచ్చే ఎన్నికల్లో ఆయన పాత్ర ఎలా ఉండబోతున్నాయనే అంశాలపై ఆసక్తి నెలకొంది. ఈ పరిణామాలు పార్టీ అభ్యర్థి ఎంపికపై ఎలాంటి ప్రభావం చూపుతాయనేది ప్రస్తుతానికి స్పష్టత రావాల్సి ఉంది.
టికెట్‌ కోసం మరో బీసీ నేత డా. సంపత్ కుమార్ ప్రయత్నాలు.?
ఇదిలా ఉండగా, ఎమ్మెల్యే టికెట్‌ ఆశిస్తున్న మరో బీసీ నాయకుడు డా. సంపత్ కుమార్ పేరు కూడా రాజకీయ చర్చల్లో వినిపిస్తోంది. దీంతో తాండూర్ బీఆర్ఎస్‌లో ఆశావహుల మధ్య పోటీ ఎలా ఉండబోతోందనే అంశంపై ఆసక్తి పెరుగుతోంది. ఒకవైపు పైలెట్ రోహిత్ రెడ్డి చుట్టూ కొనసాగుతున్న రాజకీయ పరిణామాలు, మరోవైపు డా. సంపత్ కుమార్ ఆశలు, ఇంకోవైపు నూలి శుభప్రద్ పటేల్ పేరుతో తెరపైకి వస్తున్న బీసీ సమీకరణాలు నియోజకవర్గ రాజకీయాలను ఆసక్తికరంగా మారుస్తున్నాయి.
అధిష్టానం నిర్ణయంపైనే అందరి దృష్టి..!
ఎన్నికలకు ఇంకా సమయం ఉన్నప్పటికీ, ఇప్పటి నుంచే అభ్యర్థిత్వం పై సాగుతున్న చర్చలు తాండూర్ బీఆర్ఎస్‌లో రాజకీయ కదలికలకు అద్దం పడుతున్నాయి. చివరకు సామాజిక సమీకరణాలు, నాయకుల వ్యక్తిగత బలం, క్షేత్రస్థాయిలో ఉన్న మద్దతు, పార్టీ అధిష్టానం నిర్ణయం—వీటిలో ఏ అంశం అభ్యర్థి ఎంపికలో కీలక పాత్ర పోషిస్తుందనేది వేచి చూడాలి. రాబోయే రోజుల్లో తాండూర్ బీఆర్ఎస్ టికెట్‌ రాజకీయాలు మరిన్ని మలుపులు తిరిగే అవకాశం ఉంది.
