న్యూఢిల్లీ (25 జులై ): కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా నేపథ్యంలో దేశ రాజధాని ఢిల్లీలో రాజకీయ పరిణామాలు వేగంగా మారుతున్నాయి. కేంద్ర మంత్రివర్గ పునర్వ్యవస్థీకరణపై ఊహాగానాలు ఊపందుకున్నాయి. కీలక మార్పులకు కేంద్ర ప్రభుత్వం సిద్ధమవుతోందా అనే చర్చ రాజకీయ వర్గాల్లో జోరుగా సాగుతోంది.
ధర్మేంద్ర ప్రధాన్ రాజీనామా అనంతరం విద్యాశాఖ బాధ్యతలను ఎవరికి అప్పగిస్తారనే అంశంపై ఆసక్తి నెలకొంది. ఇదే సమయంలో మహారాష్ట్ర ముఖ్యమంత్రి దేవేంద్ర ఫడణవీస్, ఉప ముఖ్యమంత్రి ఏక్నాథ్ షిండేలకు ఢిల్లీ రావాలని పార్టీ అధిష్టానం నుంచి పిలుపు రావడం మరింత ఉత్కంఠకు దారితీసింది.
కేంద్రంలో కీలక మార్పులు జరిగే అవకాశాలపై చర్చ జరుగుతున్న వేళ శివసేన (ఉద్ధవ్ వర్గం) నేత సంజయ్ రౌత్ చేసిన వ్యాఖ్యలు రాజకీయ వర్గాల్లో చర్చనీయాంశంగా మారాయి. మహారాష్ట్రలో ముఖ్యమంత్రి మార్పు ఉండొచ్చని, ఫడణవీస్కు కేంద్రంలో కీలక బాధ్యతలు అప్పగించే అవకాశం ఉందని ఆయన వ్యాఖ్యానించారు.
ఇప్పటికే కొంతకాలంగా కేంద్ర మంత్రివర్గ పునర్వ్యవస్థీకరణపై వార్తలు వెలువడుతున్నాయి. పార్లమెంట్ వర్షాకాల సమావేశాలకు ముందు మార్పులు చేపట్టాలని కేంద్రం భావించినప్పటికీ, ప్రధాని విదేశీ పర్యటనల కారణంగా ప్రక్రియ ఆలస్యమైనట్లు సమాచారం.
మరోవైపు నీట్ పేపర్ లీకేజీ వ్యవహారంపై విద్యార్థుల ఆందోళనలు, విపక్షాల నిరసనల నేపథ్యంలో విద్యాశాఖపై ఒత్తిడి పెరిగిన సమయంలో ధర్మేంద్ర ప్రధాన్ రాజీనామా రాజకీయ ప్రాధాన్యత సంతరించుకుంది.
తాజాగా కేంద్ర ప్రభుత్వం 12 శాఖల కార్యదర్శులను బదిలీ చేయడం, అందులో విద్యాశాఖ కార్యదర్శి కూడా ఉండటంతో పరిపాలనా స్థాయిలోనూ కీలక మార్పులు జరుగుతున్నాయనే సంకేతాలు కనిపిస్తున్నాయి.
ధర్మేంద్ర ప్రధాన్ రాజీనామా తర్వాత కేంద్రంలో జరిగే తదుపరి పరిణామాలపై దేశ రాజకీయ వర్గాలు ఆసక్తిగా ఎదురుచూస్తున్నాయి.
