తాండూర్ అక్టోబర్ 3( తెలంగాణ వార్త ప్రతినిధి) : వికారాబాద్ జిల్లా అనంతగిరి ఘాట్‌రోడ్డులో శనివారం ఉదయం ఘోర రోడ్డు ప్రమాదం చోటుచేసుకుంది. ప్రైవేట్ బస్సు అదుపుతప్పి బోల్తా పడిన ఘటనలో నలుగురు మృతి చెందినట్లు ప్రాథమిక సమాచారం. పలువురు ప్రయాణికులు తీవ్రంగా గాయపడినట్లు తెలుస్తోంది. ప్రమాదం జరిగిన వెంటనే స్థానికులు, పోలీసులు సహాయక చర్యలు చేపట్టి క్షతగాత్రులను ఆసుపత్రికి తరలించినట్లు సమాచారం.
ప్రమాద సమాచారం తెలుసుకున్న తాండూరు ఎమ్మెల్యే బుయ్యని మనోహర్‌రెడ్డి వెంటనే స్పందించారు. వికారాబాద్ జిల్లా కలెక్టర్‌తో ఫోన్‌లో మాట్లాడి, ప్రమాదంలో గాయపడిన వారికి తక్షణమే ప్రథమ చికిత్స, మెరుగైన వైద్య సేవలు అందేలా అవసరమైన చర్యలు చేపట్టాలని అధికారులను కోరినట్లు సమాచారం. క్షతగాత్రుల పరిస్థితిపై వివరాలు తెలుసుకోవాలని, అత్యవసర వైద్య సహాయం అందేలా చూడాలని సూచించారు.
అదేవిధంగా ప్రమాదానికి గల అసలు కారణాలను పూర్తిగా తెలుసుకోవాలని ఎమ్మెల్యే అధికారులను కోరినట్లు సమాచారం. ప్రమాదానికి కారణమైన పరిస్థితులపై అధికారులు, పోలీసులు దర్యాప్తు చేపడుతున్నారు.
కాగా, బస్సు ఎక్కడి నుంచి ఎక్కడికి వెళ్తోంది, మృతులు, క్షతగాత్రుల పూర్తి వివరాలు, ప్రమాదానికి ఖచ్చితమైన కారణాలు తదితర వివరాలు అధికారికంగా తెలియాల్సి ఉంది. పూర్తి సమాచారం అందిన తర్వాత మరిన్ని వివరాలు వెల్లడయ్యే అవకాశం ఉంది.
