తాండూర్ 18 జూన్: బీఆర్ఎస్వి ఆధ్వర్యంలో నిరుద్యోగులు, విద్యార్థులకు ఎన్నికల సమయంలో కాంగ్రెస్ ప్రభుత్వం ఇచ్చిన హామీల అమలు కోసం హైదరాబాదులో నిర్వహించ తలపెట్టిన అసెంబ్లీ ముట్టడి కార్యక్రమాన్ని అడ్డుకోవడానికి ప్రభుత్వం పోలీసులను ఉపయోగించి అక్రమ నిర్బంధాలకు పాల్పడుతోందని బీఆర్ఎస్వి జిల్లా నాయకులు దత్తాత్రేయ రావు తీవ్రంగా విమర్శించారు.
ఈ నేపథ్యంలో బీఆర్ఎస్వి జిల్లా నాయకులు దత్తాత్రేయ రావు, వినోద్ కుమార్లను ఈరోజు తెల్లవారుజామున తాండూరులోని వారి నివాసాల వద్ద ముందస్తుగా అరెస్టు చేసి తాండూరు టౌన్ పోలీస్ స్టేషన్కు తరలించడం ప్రజాస్వామ్య హక్కుల ఉల్లంఘన అని ఆయన అన్నారు.
ఎన్నికల సమయంలో నిరుద్యోగ భృతి, ఉద్యోగాల భర్తీ, విద్యార్థుల సంక్షేమం వంటి అంశాలపై ఇచ్చిన హామీలను అమలు చేయడంలో పూర్తిగా విఫలమైన ప్రభుత్వం, ప్రశ్నించే గొంతులను అణచివేసేందుకు అరెస్టులు, నిర్బంధాలను ఆయుధాలుగా ఉపయోగిస్తోందని మండిపడ్డారు.
ప్రజల సమస్యలపై పోరాడే వారిని అరెస్టు చేయడం ద్వారా కాంగ్రెస్ ప్రభుత్వం తన వైఫల్యాలను దాచలేదని, నిరుద్యోగులు మరియు విద్యార్థులకు ఇచ్చిన ప్రతి హామీని తక్షణమే అమలు చేయాలని డిమాండ్ చేశారు.
ప్రజాస్వామ్యంలో ప్రశ్నించే హక్కు ప్రతి పౌరుడికి రాజ్యాంగం కల్పించిన హక్కు అని, అక్రమ నిర్బంధాలు ఉద్యమాలను ఆపలేవని, యువత తరఫున తమ పోరాటం మరింత ఉధృతంగా కొనసాగుతుందని స్పష్టం చేశారు.
